Ambasada e Shteteve të Bashkuara (SHBA) në Prishtinë, ka reaguar, pas paralajmërimeve të shtetit të Kosovës  se  presidenti i  Serbisë, Aleksandar Vuçiq  mund të përballet me ndjekje penale për deklaratën fyese rreth  masakrës së Recakut.

Ambasada e SHBA-ve në Prishtinë   thotë se retorika nxitëse dhe rishikimi i historisë të së cilës jemi dëshmitarë kohëve të fundit lidhur me ngjarjet e vitit 1999 janë të papranueshme.

SHBA po ashtu i bën thirrje shtetit të Kosovës që të kenë kujdes në ndjekjen penale selektive të fjalës, duke u bazuar në orientimin politik apo komunitetit.

Liria e shprehjes sipas kësaj ambasade ka qenë prej kohësh parimi themelor i demokracisë.

“Retorika nxitëse dhe rishikimi i historisë të së cilës jemi dëshmitarë kohëve të fundit lidhur me ngjarjet e vitit 1999 janë të papranueshme. Gjithashtu, jeni të kujdesshëm në ndjekjen penale selektive të fjalës duke u bazuar në orientimin politik apo komunitetit. Liria e shprehjes ka qenë prej kohësh parimi themelor i demokracisë”, thuhet në reagimin e ambasadës së SHBA-ve.

Po ashtu kjo ambasadë bën thirrje për  kthim të bisedimeve mes Kosovës dhe Serbisë.

“Ngjarjet e kësaj jave paraqesin edhe një rikujtim se sa i rëndësishëm është kthimi i Kosovës dhe Serbisë në tryezën e bisedimeve dhe të ripërqendrojnë energjitë e tyre drejt së ardhmes duke normalizuar marrëdhëniet”, thuhet në reagim.

Ndryshe, “masakra e Reçakut është një trillim dhe është sajuar nga William Walker”, kështu ka deklaruar ditë më parë  presidenti i Serbisë, Aleksandar Vuçiq.

Kjo deklaratë fyese e tij, erdhi ditën kur Gjykata Themelore në Prishtinë e dënoi me dy vjet burgim ish-ministrin e Administrimit të Pushtetit Lokal të Kosovës, Ivan Todosijeviq.

Ai është gjetur fajtor për një deklaratë të dhënë vitin e kaluar me të cilën e quante trillim masakrën e Reçakut të 15 janarit 1999, kur forcat serbe vranë 45 civilë shqiptarë.

E pas kësaj, Prokuroria Speciale nuk kishte përjashtuar mundësinë që edhe presidenti i Serbisë mund të ndjeket penalisht për këtë deklaratë fyese.

Ndërkohë, Kodi Penal i Republikës së Kosovës, më saktësisht neni 147, thotë se: “Kushdo që nxit ose përhap publikisht urrejtje, përçarje ose mosdurim midis grupeve kombëtare, racore, fetare, etnike apo grupe tjera të tilla që jetojnë në Republikës e Kosovës, në mënyrën e cila mund të prishë rendin publik, dënohet me gjobë ose me burgim deri në pesë (5) vjet”./arbresh.info

Reagimi i plotë:

DEKLARATË NGA AMBASADA E SHBA-ve NË PRISHTINË

Retorika nxitëse dhe rishikimi i historisë të së cilës jemi dëshmitarë kohëve të fundit lidhur me ngjarjet e vitit 1999 janë të papranueshme. Gjithashtu, jeni të kujdesshëm në ndjekjen penale selektive të fjalës duke u bazuar në orientimin politik apo komunitetit. Liria e shprehjes ka qenë prej kohësh parimi themelor i demokracisë. Ngjarjet e kësaj jave paraqesin edhe një rikujtim se sa i rëndësishëm është kthimi i Kosovës dhe Sërbisë në tryezën e bisedimeve dhe të ripërqëndrojnë energjitë e tyre drejt së ardhmes duke normalizuar marrëdhëniet.